Në Bulqizë: Angazhim për statusin e minatorit

Lëvizja 'Shqipëria Bëhet' u ndal në takimin e radhës në Bulqizë, në një bashkëbisedim me banorët e zonës dhe minatorët.
Kreu i Lëvizjes “Shqipëria Bëhet”, Adriatik Lapaj, shpalosi angazhimin e tij për të sjellë ndryshime të mëdha në jetën e atyre që kanë sakrifikuar për vendin. Duke prekur problematikat dhe vështirësitë e kësaj zone të pasur në burime natyrore, por të varfër në zhvillim, Lapaj bëri thirrje për ndërhyrje urgjente.
“Faleminderit nga zemra, përulem para jush! Jeni të jashtëzakonshëm! Bulqiza është si ajo bukuria që vret! Është një nga zonat më të pasura të kombit shqiptar, një tokë e bekuar nga Zoti, por e mallkuar nga robi. Këtu, në 15 vitet e fundit, kanë humbur jetën mbi 300 minatorë,” tha Lapaj, duke kritikuar politikat e dështuara që nuk kanë mbështetur qytetarët e kësaj zone.

Ai theksoi se pasuria e madhe nën tokë nuk është përdorur për të përmirësuar jetën e banorëve. Sipas të dhënave që ai ndau, 10 milionë ton mineral janë nxjerrë nga Bulqiza në 20 vitet e fundit, një sasi që do të mund të ndërtonte “100 qytete si Bulqiza”.
Në vijim, Lapaj paraqiti disa angazhime konkrete nga programi i tij, duke premtuar përmirësime të prekshme nëse vjen në pushtet:
1. Ligji për statusin e minatorit: Ai premtoi miratimin e një ligji të veçantë brenda 12 muajve, që do të garantonte të drejta më të mëdha për minatorët. “Asnjë ‘pasunar’ nuk mund ta ndërtojë mirëqenien e tij mbi gjakun dhe sakrificën tuaj,” u shpreh Lapaj.
2. Sigurimi i jetës dhe shëndetit: Lapaj njoftoi se do të miratohet një ligj për sigurimin e detyrueshëm të jetës dhe shëndetit për minatorët. “Asnjë nuk do të hyjë më nën tokë pa një siguracion jete që garanton mbrojtje totale për familjen në rast aksidenti,” deklaroi ai.
3. Rritja e pensioneve: Ai parashikoi rritjen e pensioneve në fshat dhe qytet, duke synuar eliminimin e pensioneve nën 200 euro dhe rritjen graduale të pensioneve të tjera. “Lekët për këtë do të merren nga lufta kundër kontrabandës,” shtoi Lapaj.
4. Kontrolli i doganave dhe lufta kundër korrupsionit: Kreu i lëvizjes premtoi se do të marrë doganat në kontroll të plotë për të ndalur korrupsionin dhe kontrabandën që po zhvillon një grusht individësh.
5. Përmirësimi i dokumentacionit të tokave bujqësore: Ai garantoi përfundimin e procesit të pajisjes me dokumenta të tokave bujqësore dhe legalizimin e pronave brenda një afati të shkurtër.

Ndërsa Greta Ambeli, anëtare e ekipit të Lëvizjes "Shqipëria Bëhet", u ndal tek disa reforma kyçe për demokratizimin e vendit dhe krijimin e një Republike të ligjit. Ajo përmendi disa angazhime që do të realizohen gjatë qeverisjes së Lëvizjes:
1. Ligji për Statusin e Minatorit: Brenda 12 muajve të parë, do të miratohet ligji për sigurimin e detyrueshëm të minatorëve, duke garantuar sigurinë, shëndetin dhe mbështetje mjekësore për ta. Sigurimi do të jetë i detyrueshëm dhe do të mbikqyret nga shteti.
2. Ligji për Referendumet: Do të rikthehet fuqia te qytetarët, duke u mundësuar atyre të votojnë kundër vendimeve të padrejta të qeverisë, parlamentit dhe bashkive, dhe t'i shfuqizojnë ato.
3. Depolitizimi i Administratës Zgjedhore: Administrata zgjedhore do të depolitizohet, duke kaluar në duar të profesionistëve të lirë, si noteri, avokati, gjykatësi dhe prokurori.
4. Përfundimi i lidhjes mes administratës dhe politikës: Administrata nuk do të jetë më e ndikuar nga partia në pushtet, dhe asnjë punonjës administrate nuk do të detyrohet të votojë për pushtetin.
5. Depolitizimi i Policisë së Shtetit: Policia do të veprojë si forcë e shtetit shqiptar dhe jo si pjesë e partisë në pushtet.
6. Lufta kundër Korrupsionit: Do të luftohet korrupsioni nëpërmjet një ligji që do të shpallë korrupsionin e zyrtarëve të lartë si tradhti kombëtare, me dënime të ashpra dhe konfiskim të pasurisë.
Ambeli përfundoi fjalimin duke theksuar se është koha për të ndërtuar një Republikë të ligjit.

Shqipëria bëhet kur Bulqiza bëhet!
Andrea Shtjefni, shprehu angazhimin e ekipit për ndryshim. Ai e përshkroi Bulqizën si një “tokë të bekuar nga Zoti, por të mallkuar nga politika”, duke denoncuar kushtet e vështira të banorëve dhe mungesën e investimeve.
Shtjefni prezantoi disa nga masat e Lëvizjes, përfshirë subvencionimin e prodhimit bujqësor, hapjen e një Banke Kombëtare Agrare për kreditim me interesa të ulëta dhe mbrojtjen e tregut vendas nga importet kontrabandë.
“Ndryshimi nis nga këtu, ku rrahin zemrat e njerëzve të punës! Shqipëria bëhet vetëm kur Bulqiza bëhet!” përfundoi Shtjefni.

Najada Kambo: Shqipëria e dinjitetit fillon sot
Najada Kambo, anëtare e Kryesisë, paraqiti një program të qartë dhe konkret për përmirësimin e jetës së qytetarëve, me fokus në pensionet, ndihmën sociale dhe arsimin:
• Pensionet nën 20,000 lekë do të rriten menjëherë, ndërsa ato mbi këtë shumë do të shtohen me 2,500 lekë çdo vit për katër vite.
• Kujdestarët e personave me aftësi të kufizuara do të marrin paga dhe sigurime nga shteti.
• Fëmijët në nevojë do të përfitojnë ushqim falas në shkolla dhe karta ushqimore me 3,000 lekë në muaj.
• Studentët nga familje në vështirësi ekonomike do të kenë akses në kredi pa interes për studimet e larta.

“Shqipëria nuk mund të jetë një vend i ndarë mes pak të privilegjuarve dhe shumë të harruarve. Çdo shifër e këtij programi përfaqëson një familje që do të jetojë më mirë, një student që do të studiojë dhe një person që do të fuqizohet,”  përfundoi Kambo, duke kërkuar mbështetje për një të ardhme me dinjitet për të gjithë.

Ervis Çela: Vota e Diasporës dhe Referendumet, shtyllat e sovranitetit të popullit

Ervis Çela nga ekipi qendror, shprehu mirënjohjen e tij për mbështetjen e vazhdueshme të banorëve, duke theksuar rëndësinë e angazhimit qytetar për të garantuar të drejtat e popullit shqiptar. Ai vlerësoi arritjen e së drejtës për votën e Diasporës, duke e cilësuar si një hap të rëndësishëm drejt forcimit të demokracisë.

“Për më shumë se 30 vjet, vota e Diasporës ka qenë një premtim i pa realizuar. Por falë përpjekjeve tona të përbashkëta dhe mbledhjes së firmave, kjo e drejtë po bëhet realitet. Ky është një shembull i qartë që ndryshimi vjen me përpjekje të vazhdueshme,” tha Çela.

Ai gjithashtu u ndal te nevoja për të forcuar sovranitetin e popullit përmes referendumit. “Kur një vendim i pushtetit nuk është në përputhje me interesat e popullit, duhet të kemi mundësinë ta rishikojmë atë përmes referendumit. Por, për fat të keq, mungon një ligj që e mundëson këtë, edhe pse Kushtetuta e parashikon,” theksoi ai, duke e cilësuar këtë si një nga sfidat më të mëdha për të ardhmen.

Ervisi bëri thirrje për rritjen e angazhimit qytetar, duke kërkuar një mobilizim të fuqishëm për të garantuar që çdo vendim të merret në përputhje me vullnetin e popullit.

Etleva Merko: Arsimi është çelësi i së ardhmes

Nënkryetarja e Lëvizjes, Etleva Merko, denoncoi nivelin e ulët të investimit në arsimin shqiptar, duke theksuar mungesën e infrastrukturës, pagat e ulëta të mësuesve dhe cilësinë e dobët të arsimit, të reflektuar në rezultatet e testeve si PISA.

Ajo prezantoi një plan konkret për ndryshim:
• Rritje të buxhetit për arsimin në 5% të PBB-së brenda dy viteve.
• Dyfishim të pagave të mësuesve në katër vitet e mandatit të parë.
• Orar të zgjatur në shkolla deri në orën 17:00.
• Investime nga fitimet e burimeve natyrore në shkolla dhe bursa për nxënësit.

“Një shoqëri që investon në arsim, investon në të ardhmen. Ky është momenti ynë për të ndryshuar historinë! Ju keni një alternativë: SHQIPËRIA BËHET,” përfundoi ajo.

‍

Kontribuo për qëllimin e përbashkët: https://www.shqiperiabehet.al/kontribuo

Shikoni galerine e fotove

‍